15 навучэнцаў політэхнічнага каледжа на чале з камандзірам Аляксеем Бурачонкам прайшлі сур’ёзны адбор. Абавязковай умовай была наяўнасць рабочай прафесіі з разрадам.
Для будучых спецыялістаў прамысловага і грамадзянскага будаўніцтва гэта не першае працоўнае лета. На канікулах яны не прывыклі сядзець без справы.
— Трапіць на будоўлю атамнай электрастанцыі для нас асаблівы гонар, — заўважае камандзір атрада. – Мы перакананы, што наша работа будзе карысная дзяржаве. Важна і тое, што ў нас з’явілася магчымасць замацаваць тэарэтычныя веды на практыцы, удасканаліць прафесійныя навыкі, а таксама зарабіць грошы. Райкам БРСМ ужо ў трэці раз накіроўвае хлопцаў у Астравец.
Чытайце: Будатрад едзе на будоўлю Астравецкай АЭС
— Пры фарміраванні атрадаў нікога не трэба было ўгаворваць. Наша моладзь актыўная і працавітая, клапоціцца аб дабрабыце краіны, — зазначыла выконваючая абавязкі першага сакратара райкама БРСМ Марта Матусевіч. – Хацелася б толькі, каб больш плённа з намі супрацоўнічалі прадпрыемствы, арганізацыі Маладзечаншчыны і работадаўцы ішлі насустрач падрастаючаму пакаленню, не лічылі гэта пытанне лішнім клопатам. Для нас вельмі важна, каб рух студатрадаў спрыяў фарміраванню прафесіяналаў сваёй справы, выхоўваў у іх працавітасць і прыстойнасць. Сёлета знайсці часовыя працоўныя месцы для моладзі больш складана, чым летась.
Тым не менш, у раёне плануецца працаўладкаваць на летнія канікулы каля 800 старшакласнікаў, навучэнцаў і студэнтаў ад 16 гадоў. Яшчэ раней былі сфарміраваныя 11 атрадаў на базе Беразінскага аграрна-тэхнічнага ліцэя, Чысцінскай СШ, аздараўленчага лагера «Івалга», ААТ «Палачаны». Юнакі і дзяўчаты займаліся некваліфікаванай работай, добраўпарадкаваннем тэрыторый, рамонтам памяшканняў, мэблі. З 27 ліпеня юныя памочнікі прыйдуць і ў Маладзечанскі лясгас. Таксама на працягу лета школьнікі і навучэнцы будуць працаваць у паштовых аддзяленнях раёна і мясцовых гаспадарках.
